English text here
👋 O Proxecto Nós está a xerar os recursos necesarios para colocar o galego na vangarda das tecnoloxías intelixentes, nomeadamente naquelas áreas relacionadas coas tecnoloxías lingüísticas e, de modo xeral, na sociedade e economía da intelixencia artificial. O Proxecto Nós é un proxecto da Xunta de Galicia cuxa execución foi encomendada á Universidade de Santiago de Compostela, a través de dúas entidades punteiras de investigación en intelixencia artificial e tecnoloxías da linguaxe: o ILG (Instituto da Lingua Galega) e o CiTIUS (Centro Singular de Investigación en Tecnoloxías Intelixentes).
Dentro do proxecto vanse compilar recursos e desenvolver ferramentas de alta calidade para o procesamento automático do galego, tanto oral como escrito. Ademais, produciranse demostradores de carácter xeral que permitirán mostrar as posibilidades dos ditos recursos e desenvolveranse casos de uso de alto impacto socioeconómico en diferentes contextos. O proxecto encádrase dentro das estratexias galega, española, e europea orientadas ao desenvolvemento de tecnoloxías, ferramentas e aplicacións para a proxección e uso das linguas nos ámbitos de aplicación da intelixencia artificial.
Os recursos desenvolvidos en Nós son de libre acceso por terceiros, o que vai permitir e facilitar o desenvolvemento de produtos e servizos finais baseados na lingua galega, por parte das empresas, institucións e organizacións, tanto públicas como privadas, que así o desexaren. Por último, a adopción dentro do Proxecto Nós de licenzas libres permitirá que recursos, ferramentas e ata casos de uso poidan ser mantidos pola comunidade de software libre e tamén polas empresas, o que permitirá que a comunidade galego-falante e galego-escribente poida realizar a súa vida diaria na sociedade dixital do século XXI.
A partir desta páxina do Proxecto Nós podes acceder a diferentes repositorios:
- 📚 Corpus: corpus monolingües e multilingües de fala e texto para galego.
- 🤗 Modelos de lingua: modelos lingüísticos a seren descargados para distintas aplicacións de procesamento da linguaxe natural.
- 📱 Demos: páxinas web de demostración dos mellores modelos desenvolvidos polo equipo do Proxecto Nós.
-
Os corpus poden ser descargados baixo licenzas: Creative Commons 4.0
-
Os modelos da linguaxe poden ser descargados baixo licenzas MIT e Apache-2.0.
Se quixeres participar para a mellora dos corpus de voz e texto, ou dos modelos que estamos desenvolvendo, só tes que pedir ser incluído/a na nosa comunidade e entrar en contacto con cada un/unha dos responsábeis dos proxectos de voz e texto que están a ser desenvolvidos. Es sempre benvido/a!
- 🌐 Visitar a nosa páxina web https://nos.gal/
- 📧 Escribir ao proxecto.nos@usc.gal
- 🦋 Seguir o Proxecto Nós en Bluesky
Dentro do proxecto Desarrollo de Modelos ALIA, os resultados do Proxecto Nós están financiados polo Ministerio para a Transformación Dixital e da Función Pública e polo Plan de Recuperación, Transformación e Resiliencia – Financiado pola Unión Europea – NextGenerationEU.
Este proxecto con referencia 2022/TL22/00215336 está financiado polo Ministerio para a Transformación Dixital e da Función Pública e polo Plan de Recuperación, Transformación e Resiliencia - Financiado pola Unión Europea – NextGenerationEU, dentro do marco do proxecto ILENIA.
O "Proxecto Nós: O galego na sociedade e economía da intelixencia artificial" é posíbel grazas ao financiamento resultado do convenio 2021-CP080 entre a Xunta de Galicia e a Universidade de Santiago de Compostela, e ao Programa Investigo, dentro do Plan Nacional de Recuperación, Transformación e Resiliencia, no marco do Fondo Europeo de Recuperación (NextGenerationEU).
